利物浦爭冠神器　戴亞斯已拎聯賽冠軍！

最強博彩盤路過關神器《串績王》：http://win.on.cc/football/　

利物浦喺英超同熱刺打和1比1失分，爭冠機會受到嚴重打擊，不過冬季轉會窗加盟嘅路爾斯戴亞斯，就繼續自己突出嘅表現，成為利物浦爭冠神器！呢位哥倫比亞國腳更率先嘗到聯賽冠軍滋味，事關波圖周日(8日)凌晨喺葡超提前封王，踢咗超過半季嘅戴亞斯亦可得到冠軍獎牌。

利物浦喺1月用5,000萬鎊簽入路爾斯戴亞斯，事實證明係超值收購，佢加盟後踢22場已有6個入波同3次助攻，除咗今仗逼和熱刺入波之外，上周中歐聯4強次回合對維拉利爾亦攻入追平1球，可以話係「紅軍」鋒線入面狀態最好一員，利物浦爭冠靠晒佢！

無論利物浦最後結果係點，路爾斯戴亞斯今季已經拎到大成功，隨住波圖周日擊敗賓菲加後，波圖已提前奪得葡超冠軍，路爾斯戴亞斯1月轉會利物浦前，就為波圖喺聯賽上陣18場入14球，將會獲得葡超冠軍獎牌。