最強博彩盤路過關神器《串績王》：http://win.on.cc/football/　

曼聯新任行政總裁李察阿諾特上場後，準備將球隊由上到下進行重建，其中一個令佢最不滿嘅地方，就係曼聯嘅社交媒體政策。任職3年半嘅傳訊部總監布綠斯喺2月宣布辭職，媒體主管寧治早前亦被加利尼維利炮轟，不過就喺李察阿諾特表達不滿後，曼聯twitter日前又再「瀨嘢」，引嚟球迷狂轟。

曼聯周日(8日)吞白禮頓4蛋，比賽幾個鐘頭後，曼聯官方twitter竟然出咗一篇文：「坦哈格嘅球隊經歷戲劇性下午，喺荷甲爭標繼續保持優勢」。貼文一出即被曼迷瘋狂洗版，直指曼聯「無恥」咁借阿積士爭冠作為慘敗遮羞布，眼見球迷群情洶湧，曼聯冇幾耐之後就將貼文刪除。

唔少憤怒球迷留言話：「官方twitter出呢則消息真係好X尷尬，唔怪得佢哋即刻刪文」、「曼聯嘅社交媒體團隊，同真正球隊一樣咁唔掂」、「10年冇英超冠軍、15年冇歐聯冠軍、6年冇拎過任何冠軍，曼聯個編輯覺得球迷會有興趣知道阿積士捧盃機會？」