干地翻舊帳 怒插英超賽程安排離譜  

20220511
東網電視
更多新聞短片
(Getty images)
最強博彩盤路過關神器《串績王》:http://win.on.cc/football/ 
阿仙奴作客對熱刺嘅北倫敦打吡,本來喺今年1月中舉行,但因兵工廠「人腳唔齊」而延期至本周五(13日)凌晨舉行。賽前熱刺領隊干地炮轟英超賽會,認為今次補賽對熱刺相當唔公平同不利,事關球隊周日(15日)晚就會對般尼,體力負荷太大,隨時影響爭奪前4機會。
今年1月阿仙奴稱聲有球員感染新冠肺炎缺陣,唔符合賽會規定嘅最少有13位非門將球員,以及1位門將,結果成功向英超賽會申請將對熱刺一戰延期。
至今干地仲認為事件非常奇怪:「依家談論過去發生嘅事情都冇用,但好奇怪嗰場比賽因新冠疫情被推遲,因為阿仙奴明明冇人受感染;如果比賽可以如期舉行,球隊有好大勝算,因為對方有唔少球員受傷同踢緊非國盃。」
據悉當時阿仙奴只有中場馬田奧迪加特確診,球隊人腳唔齊主因係多傷兵、停賽及有球員離隊踢非國盃,並非受疫情影響,但兵工廠申請延期獲批,當時已引起熱刺、車路士等球隊不滿。
不過,干地認為熱刺比起1月份表現有明顯進步,尤其球員更有組織力及強大,擁有更多足球知識,有信心主場可以全取3分。
周五(13日)凌晨踢完北倫敦打吡後,熱刺周日(15日)晚就會硬撼護級分子般尼,短時間內連踢2場,對球員體能好大考驗,難怪干地顯得非常憤怒:「我講過領隊唔應該抱怨,但依家輪到我抱怨,因為有時真係好難接受英超賽會決定,尤其之前因為佢哋唔肯讓步,令我哋對雷恩嘅歐協聯分組賽需要自動棄權,不過如果球隊同意咗賽期改變,領隊亦必須接受。」
賽前排第5嘅熱刺,目前同「4哥」阿仙奴只係相差4分,如果要爭取來季歐聯席位,今場絕對不容有失。