結婚轉運？曼聯隊長秘密註冊

足球博彩神器，每日重心提供盡在《彩報》：http://win.on.cc/football/　

曼聯隊長哈利馬古尼周四(12日)被英國傳媒影到，同青梅竹馬女友fern前後腳離開婚姻登記處，女方更戴上巨型婚戒，傳媒追查證實兩人已秘密註冊結成夫婦，並已經訂好今夏喺法國城堡行禮，希望隊長小登科，能為曼聯沖喜啦。

馬古尼同女友於2011年結識，2018年確定戀情，一直走到依家，期間馬古尼嘅事業發展順利，入選國家隊、天價加盟曼聯，但今季遇上阻滯，喺曼聯頻頻蝦碌，被香港球迷改花名「麥麥送」，來季極大可能被褫奪隊長名銜，加上曼聯成績下滑，事業跌落谷底。

球場失意，馬古尼同女友決定踏入人生新階段，周四完成訓練後，喺婚姻登記處同女友前後腳出現，據悉兩人已低調註冊，馬古尼父母都在場，只通知小部份親友。

消息稱，兩人將於今夏喺法國一個城堡舉辦婚禮，到時馬古尼個妹同國家隊門將比碧福特太太都係姊妹團成員。