杜曹講嘢有骨：高普最叻扮豬食老虎

最強博彩盤路過關神器《串績王》：http://win.on.cc/football/　

將於周六(14日)深夜舉行嘅英足盃決賽，車路士對利物浦，雙方兩位德國名帥杜曹、高普繼今屆英聯盃決賽之後，又再次決戰，賽前車仔領隊杜曹暗寸高普最叻扮豬食老虎，擅長示弱於人，博取同情，繼而得到全國人民支持。

杜曹話：「現時整個國家都支持利物浦，我感覺到呢方面氣氛，亦好理解，因為係高普執教利物浦，佢好擅長創造奇迹，往往以弱者姿態勝出，好易博取別人同情，令人着迷，佢執教多蒙特時期，整個德國都支持多蒙特，執教利物浦之後，亦令人覺得整個英國都支持利物浦。」

早前曼城領隊哥迪奧拿曾經表示，每個英國人都希望利物浦今季成為四冠王，杜曹依家亦指全英國撐紅軍，似乎想將壓力轉移畀對方。