沙拿VVD齊齊傷出 踢唔踢到歐聯決賽?

2022年05月15日 09:00
東網電視
更多新聞短片
最強博彩盤路過關神器《串績王》:http://win.on.cc/football/ 
利物浦喺英足盃決賽勇奪今季第2個冠軍,不過亦為英超同歐聯爭逐埋下隱憂,2大攻守主力穆罕默德沙拿同華基爾雲迪積克(VVD),喺今場決賽先後受傷提早退下火線,最後2輪聯賽未必能夠趕及上陣,不過高普證實2人傷勢並唔算嚴重,如無意外可以喺歐聯決賽復出。
埃及前鋒穆罕默德沙拿今場只係踢咗33分鐘,就因為鼠蹊部傷患離場,由迪亞高祖達入替,而荷蘭中堅VVD亦喺90分鐘法定時間完結前「頂唔住」,改由祖爾麥迪比上陣。2大主將喺一場關鍵決賽傷出,令球迷非常擔心。
不過,利物浦領隊高普賽後透露:「我當然有同佢哋傾過,佢哋睇落都OK,以我所知唔係咩嚴重傷患,不過下場比賽喺星期三(18日)凌晨,要佢哋復出係太趕。」高普透露「希望」2位主力可以喺英超煞科前復出,而球迷最關心係5月29日上演嘅歐聯決賽,沙拿賽後被記者問到會唔會趕得切復出,佢就回應:「當然可以!」