溫布萊詛咒?美臣蒙特3年6輸決賽

2022年05月15日 10:02
東網電視
更多新聞短片
最強博彩盤路過關神器《串績王》:http://win.on.cc/football/ 
勝敗乃兵家常事,不過對車路士中場美臣蒙特嚟講,溫布萊球場就成為佢嘅地獄。周日(15日)凌晨英足盃決賽佢射失關鍵12碼,令車路士輸畀利物浦失落冠軍,更加係美臣蒙特3年來第6次喺溫布萊球場上演嘅決賽輸波!
美臣蒙特首次溫布萊決賽係2019年,當時佢以外借身份效力英冠打比郡,結果喺升班附加賽決賽輸畀阿士東維拉,無緣帶領球隊升上英超。第2年佢重返車路士,協助球隊殺入英足盃決賽,但輸畀阿仙奴屈居亞軍;上季車路士再入英足盃決賽,結果輸畀李斯特城再一次飲恨。
上年夏天歐國盃決賽,美臣蒙特協助英格蘭殺入決賽,但激戰下互射12碼輸畀意大利,第4度喺溫布萊鎩羽。今季車路士先後殺入英聯盃同英足盃決賽,結果2次都被利物浦互射12碼擊倒,意味呢位23歲球星出道以來,6次喺溫布萊踢決賽全部輸晒。