拜仁官方首次承認　羅拔佬拒絕續約

最強博彩盤路過關神器《串績王》：http://win.on.cc/football/　

拜仁慕尼黑前鋒羅拔利雲度夫斯基去留問題一直眾說紛紜，球會體育總監沙歷咸美斯首次承認，呢位33歲波蘭國腳拒絕續約，意味會方好可能提早今夏出售佢，以免人財兩失。

沙歷咸美斯被傳媒問到「羅拔佬」續約問題時，透露對方無意留隊：「我同羅拔利雲度夫斯基傾過，佢明確表示唔接受會方提出嘅續約條件，同埋想離開拜仁，接受新挑戰。」

羅拔利雲度夫斯基將於明年6月尾約滿，盛傳西甲勁旅巴塞隆拿計劃以3,000萬歐元收購佢，甚至有傳雙方已經達成口頭協議，將會簽約3年。不過，沙歷咸美斯表示，巴塞隆拿仲未向拜仁提出收購報價。

另外，已提早奪得今季德甲冠軍嘅拜仁慕尼黑喺周六(14日)晚煞科戰，領先2球優勢下，作客被禾夫斯堡逼和2比2，羅拔利雲度夫斯基頂入1球，以35個入球成為今季德甲神射手。