合約漏洞！阿仙奴平簽巴西新星

最強博彩盤路過關神器《串績王》：http://win.on.cc/football/　

阿仙奴正為英超前4衝刺，不過球隊嘅組軍工作已經展開，據報佢哋已傾擔簽入巴西19歲新星馬昆奴斯，呢位翼鋒被視為巴甲其中一粒明日之星，不過阿仙奴就把握佢同聖保羅合約中嘅漏洞，只係用300萬鎊就成功搶人，可以話係執到寶。

馬昆奴斯18歲就為聖保羅一隊上陣，依家已幫呢支巴甲名牌上陣超過30場，包括出戰南美自由盃等賽事，原本佢喺2019年同聖保羅簽約5年，但國際足協早前以佢簽約嗰陣未夠18歲為由，裁定合約只能夠係基本3年合約，意味佢將會回復自由身，聖保羅為免人財兩失，唯有答應平價將佢賣走。

馬德里體育會、狼隊同阿仙奴都向馬昆奴斯斟介，不過阿仙奴嘅巴西總監伊度就成功遊說聖保羅做交易，據報雙方更打算建立合作關係，將來一齊發掘更多青年球員。司職右翼嘅馬昆奴斯，預料會參加阿仙奴季前集訓，但亦可能會被阿仙奴外借去其他球會吸收經驗。