麥巴比膺法甲最佳　預告即將宣布去向

最強博彩盤路過關神器《串績王》：http://win.on.cc/football/　

巴黎聖日耳門(PSG)前鋒基利安麥巴比，周日(15日)大熱當選法甲今季最佳球員，亦係佢連續第3季獲得呢項殊榮。麥巴比喺頒獎禮中更預告，佢嘅去留已經差唔多有定案，即將會正式宣布，普遍預計麥巴比會加盟西甲勁旅皇家馬德里。

麥巴比今季以25球同17次助攻數據，帶領PSG贏得法甲冠軍，連續第3季當選法甲最佳球員係毫無懸念，佢喺頒獎嘉賓亨利手上領獎後，先多謝隊友同教練，同時回應主持詢問最多人關心嘅去向問題，麥巴比表示：「我會喺6月返法國隊前宣布去向，依家唔可以講住，但係你哋好快就會知道，已經差唔多有定案。」報道指麥巴比同皇馬已經達成口頭協議，呢位法國前鋒將會以自由身簽約5年。

今次法甲頒獎禮當中，皇家馬德里前鋒賓施馬獲選為法國最佳外流球員，由阿仙奴外借去馬賽嘅威廉沙列巴被選為最佳青年球員，PSG門將基安盧基當拿隆拿係最佳門將，至於雷恩主帥真尼斯奧就當選最佳教練。