富安健洋又受傷　阿迪達：我哋唔配踢歐聯

足球博彩神器，每日重心提供盡在《彩報》：http://win.on.cc/football/　

阿仙奴喺英超爭前4關鍵大戰，作客0比2不敵紐卡素，仲損兵折將，後衞富安健洋上半場受傷退下火線，預料無緣煞科戰主場愛華頓，令兵工廠雪上加霜。

富安健洋踢到39分鐘，因為感到腳部痛楚，被逼退下火線，由薛迪索拉斯入替。23歲嘅富安健洋上年夏天由博洛尼亞加盟阿仙奴之後，有不俗表現，奠定正選位置，但佢喺今年1月英聯盃對利物浦一役受傷，一度缺陣3個月，直至上月對曼聯，先至復出，估唔到依家又受傷，肯定令領隊阿迪達好頭痛。

賽後阿迪達承認兵工廠技不如人：「感到好失望，紐卡素比我哋強100倍，以我哋今場嘅表現，根本達唔到參加歐聯嘅水平。」兵工廠中場格列沙加亦指球隊全場表現差到難以形容，唔配喺球場上比賽，為球迷感到難過。