費特梳爾續約煞停　或遭坦哈格清洗

最強博彩盤路過關神器《串績王》：http://win.on.cc/football/　

曼聯中場費特、左後衞勞基梳爾只剩下1年合約，原本會方應該開始同佢哋傾續約，但根據英國《鏡報》爆料，曼聯管理層決定煞停續約，等待新領隊坦哈格上任之後，交由呢位荷蘭名帥決定2人命運。

根據2人合約，曼聯有權選擇自動同佢哋續約1年，但會方有所猶豫，遲遲未作出決定，主要原因係未知坦哈格是否想留用費特、勞基梳爾。2人今季表現未理想，其中巴西國腳費特身為防守中場，但攔截力欠佳，踢法唔夠硬朗，未能發揮出防線第一道屏障作用，早已經備受批評。

事實上，近期不時傳出坦哈格最希望簽入防中，目標包括法蘭基迪莊、迪格蘭賴斯等，一旦成功簽入新兵，費特好大機會被棄用。

至於勞基梳爾無復上年歐國盃勇態，加上呢位英格蘭國腳係「玻璃腳」，經常受傷，亦令會方對於同佢續約有所保留，唔排除坦哈格亦會簽入新左閘。