厄瓜多爾隨時被DQ 意大利世盃夢重燃?

2022年05月18日 22:00
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
於南美區世盃外成功殺出重圍,奪得卡塔爾世盃決賽周資格嘅厄瓜多爾,早前被揭發喺外圍賽期間起用違規球員,有機會被褫奪比賽資格。近日有意大利奧委會成員就表示,如果厄瓜多爾違規屬實,意大利有機會從中得益,以遞補身分獲得世盃決賽周入場券。
智利足總早前上告國際足協(FIFA),指控厄瓜多爾喺南美區世盃外期間,有份上陣嘅拜朗卡斯迪路出生於哥倫比亞,而唔係厄瓜多爾,質疑厄國起用唔合資格球員出賽,並指有人涉嫌偽造文件,FIFA上周表示事件已提交至紀律委員會進行調查。
近日意大利奧委會成員法蘭高芝文迪(Franco Chimenti),就認為厄瓜多爾好有可能因為呢件事付出代價,而意大利或成為得益者:「如果厄瓜多爾被罰,根據FIFA條例,應該由世界排名最高嘅另一支國家隊應該頂替佢哋,現時為止,應該由意大利定上。」
拜朗卡斯迪路今屆世盃外為厄瓜多爾上陣8次,包括兩次面對智利取得1勝1和成績。據意大利媒體《共和報》報道,FIFA已準備兩個方案,一係畀喺世盃外歐洲區附加賽失利嘅意大利,以遞補身分打入決賽周,一係重新計算世盃外期間,厄瓜多爾喺拜朗卡斯迪路有份出場比賽中所得嘅分數,並由智利頂替厄國取得決賽周資格。