神奇隊長：煞科日全力阻止曼城

足球博彩神器，每日重心提供盡在《彩報》：http://win.on.cc/football/　

英超周日煞科，曼城僅1分之微領先利物浦，煞科日曼城主場對阿士東維拉、利物浦主場對狼隊將決定冠軍誰屬，巧合嘅係維拉主帥就係利物浦神奇隊長謝拉特，呢位紅軍球迷至愛表示，煞科日定必全力阻止曼城取勝！

作為利物浦傳奇，謝拉特好明白自己嘅責任，對於球隊如何對待煞科日賽事，佢咁樣講：「邊隊爭冠軍與我無關，我係維拉主帥，今場賽事關乎我哋能否取得3分，而且贏波係我嘅責任。」

謝拉特承認，雖然煞科日勝負對維拉並無影響，但要向觀眾負責：「今場對維拉好重要嗎？不，並不重要，呢個係佢哋嘅睇法，事實亦係咁樣，因為我哋毋須護級同爭冠，不過，球迷入場睇我哋，我哋好多球迷到訪曼城睇呢場波。我哋要做好自己，努力以強勢表現完成球季，爭取積極結果，並努力提升聯賽排名。」

利物浦隊長佐敦軒達臣表示，會打電話畀謝拉特，希望對方幫忙阻止曼城，主帥高普則稱唔會同謝拉特聯絡，因為佢相信謝拉特一定會全力爭勝。