干地穩袋250萬鎊　要求熱刺再擴軍

最強博彩盤路過關神器《串績王》：http://win.on.cc/football/　

熱刺只要喺英超煞科日對已降班嘅諾域治保住唔輸，就能以英超第4名取得來季歐聯資格，可以話係簡單任務，到時主帥干地就可以獲得250萬鎊獎金，而來季征戰歐聯，干地更要求會方擴軍，再簽6名球員。

干地去年11月接手熱刺，當時熱刺排第9，依家第4名歐聯資格在望，可見干地領軍能力非凡，執教熱刺期間在最高可得81分範圍下取得53分，其中最重要一戰當然係早前3比0擊敗阿仙奴，確定第4位置。

若然歐聯資格到手，干地將要求熱刺繼續擴軍，希望簽入6名球員，包括3名後衞、1名中場及1名前鋒，中場人選熱刺已有眉目，就係重召回復自由身嘅基斯甸艾歷臣，其他新兵仲要再搵。

此外，兩位借將阿特蘭大嘅基斯甸羅美路，同埋祖記借將古路施夫斯基表現對辦，干地希望買斷，基斯甸羅美路出價4250萬鎊，而古路施夫斯基則以2500萬鎊買斷。