車路士和波 「黑腳」新班主6次入場未贏過

20220520
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周五(20日)凌晨英超,車路士主場出擊,僅逼和李斯特城1比1,車仔新班主Todd Boehly又入場睇波,但仍未能親眼見證球隊贏波,有統計發現呢位美國富商6次入場睇車路士比賽,成績僅3和3負,佢由車仔「救世主」變成「大黑腳」。
車路士已穩奪下屆歐聯入場券,今場成為例行公事,但雙方仍然一開波就攻鬥。開賽6分鐘,李斯特城中場占士麥迪臣勁射入網,打開紀錄,車路士由馬高斯阿朗素左路窄角度凌空抽射入網扳平。
雙方下半場互有攻守,但始終未能再增添紀錄,維持1比1完場。比賽過程出現溫馨一幕,車路士球迷拉起大型橫額支持喺早前英足盃決賽射失12碼嘅美臣蒙特以及領隊杜曹,認為2人今季已經為球隊作出巨大貢獻,鼓勵佢哋振作。
另外,觀眾席上再次見到車仔新班主Todd Boehly身影,佢睇到球隊未能贏波,明顯覺得好冇癮,車路士將於周日(22日)晚英超煞科戰主場對已篤定降班嘅屈福特,成為Todd Boehly今季「開齋」最後機會。