4大聯賽本周「大結局」 邊隊可以笑到最後

2022年05月20日 19:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
本周英超、西甲、意甲及法甲煞科,就如睇電視劇一樣,中間Miss咗少少唔緊要,大結局點都要睇;利物浦爭冠軍、阿仙奴爭前4、國際米蘭後上封王、維拉利爾爭歐協聯資格等,究竟上天嘅劇本最終點樣譜寫,會唔會有逆轉奇迹,大家要拭目以待!
截劫曼城最後重任 利物浦衝冠旨意謝拉特
隨住利物浦於周中反勝修咸頓,目前仍落後榜首曼城1分,令今季英超「藍紅」之爭,要鬥到煞科日先知冠軍誰屬。利物浦於尾輪迎戰狼隊,佢哋除咗要做好贏波本分之外,亦要寄望曼城於煞科戰對阿士東維拉失分,先至可後上封王;咁啱維拉主帥係「紅軍」前隊長謝拉特,因此無論係主帥高普定現任隊長佐敦軒達臣,都開到聲叫「謝老四」幫幫手。
作為功勳滿瀉嘅「神奇隊長」,謝拉特於利物浦生涯最大遺憾,必定係2013/2014年度球季;由2014年2月起,「紅軍」聯賽豪取11連勝,眼見首奪英超錦標無限接近之際,點知喺主場迎戰半力出擊嘅車路士,謝拉特於中圈位置突然跣腳,畀丹巴巴亞長驅直進先開紀錄,最終輸0比2,之後兩輪僅得1勝1負,益咗曼城後來居上奪冠。謝拉特呢下「世紀一跣」,箇中痛苦刻骨銘心,如今母會有難,維拉又成為截劫曼城嘅最後希望,「神奇隊長」必定想用另一個身份,去彌補當年遺憾。
謝四:我責任係率領維拉贏波
對於今場勝負,謝拉特話:「邊隊爭冠軍與我無關,不過我係維拉主帥,贏波係我嘅責任,而且好多維拉球迷到訪曼城睇呢場波,我哋要做好自己,以強勢表現完成球季,爭取積極結果,努力提升聯賽排名。」
四哥之爭熱刺佔先機
由於阿仙奴聯賽兩連敗,歐聯入場券版嘅「北倫敦打吡」亦大局已定,熱刺目前領先阿仙奴2分排第4位,而且得失球差有15球優勢,意味熱刺煞科戰作客包尾嘅諾域治,只要攞1分已經足夠躋身來屆歐聯。
阿仙奴反Cup有前科
不過,足球場上無奇不有,阿仙奴亦曾經試過喺煞科日上演奇迹逆轉!2005/2006球季煞科日,熱刺只要贏波就保住第4位,但佢哋賽前出現多位球員食物中毒,因而缺陣關鍵大戰,最終熱刺1比2輸畀韋斯咸,被「兵工廠」反超前搶走歐聯資格。
當然,今次逆轉嘅難度比起當年大大增加,熱刺對手只係篤定降班嘅諾域治,阿仙奴要寄望「金絲雀」爆大冷之外,自己亦要主場擊敗愛華頓,相信要有超級戲劇性嘅發展,先會製造到驚喜結局。
沙拿擸金靴要問過孫興民
英超冠軍同護級都非常緊湊,金靴獎爭逐同樣極有睇頭!熱刺嘅南韓前鋒孫興民季尾狀態巔峰,依家只係1球落後首位嘅穆罕默德沙拿(22球),大有機會後來居上,成為英超史上首位來自亞洲嘅金靴獎得主!
卡尼割愛讓出操刀權?
穆罕默德沙拿貴為兩屆英超神射手,今季早就喺射手榜一支獨秀,不過對上兩個幾月只入2球,最近1個月更夥粒無收,相反孫興民愈射愈有,近9場聯賽狂入10球,今季21個聯賽入波都係運動戰取得,完全冇來自12碼。
其實熱刺12碼向來由哈利卡尼包辦,不過近期就有唔少爭議,球迷覺得為咗孫興民爭金靴獎,哈利卡尼理應讓出操刀權。熱刺連續兩仗都獲得12碼,如果由孫興民主射的話,「老孫」可能已經處於領先位置。
當然,熱刺之前要為前4爭逐搏命,唔會輕易更換劊子手,不過依家前4位置已非常穩陣,如果煞科戰再有12碼,隨時會由孫興民操刀,再加上穆罕默德沙拿煞科戰因傷上陣成疑,孫興民仲有機會為亞洲增光呀!
曼聯韋斯咸歐霸保衞戰
曼聯上仗英超0比4慘敗畀白禮頓後,就算煞科戰作客擊敗水晶宮,都只有61分,創下球隊喺英超史上最低分一季,看守領隊蘭歷克孭晒鑊。不過呢位德國名帥最後領軍仲有一項重要任務,就係為「紅魔鬼」奪取歐霸盃入場券。由於英超第5、6位可以踢下屆歐霸盃,第7位只能參加歐協聯,曼聯現時僅領先第7位韋斯咸2分,淨得球少對方10球,若然再失分,隨時被韋斯咸搶走歐霸盃席位。
莫耶斯乘機報仇
值得一提,曼聯候任新帥坦哈格唔想球隊踢歐協聯,如果不幸做咗「阿7」,可能會影響下季部署。由前曼聯主帥莫耶斯領軍嘅韋斯咸上仗爆冷打和曼城,士氣大振,同埋呢支倫敦球隊打入今屆歐霸盃4強,贏盡口碑,當然希望下屆繼續參賽,勢必力爭喺英超煞科戰擊敗白禮頓,希望反超前曼聯,莫耶斯亦可趁機一報當年被炒魷之仇。
A米遇攔路虎國米後上封王未絕望
今季意甲爭標形勢激烈,要踢埋周日晚最後一輪賽事,先至知道冠軍誰屬;現時榜首AC米蘭領先次席嘅國際米蘭2分,根據意甲賽制,同分先計對賽成績,「米蘭雙雄」兩循環聯賽交鋒,A米獲1勝1和,換言之A米只要作客打和薩斯索羅,就可以相隔11年重奪意甲冠軍,兼追平國米(19次),並列捧盃次數第2多球隊,僅次於祖雲達斯。
薩斯索羅兩挫紅黑兵團
「祖記王朝」衰落後,「米蘭雙雄」重新崛起,國米上季拋離A米12分成為意甲盟主,今季輪到A米發威,佢哋一直發揮平穩已保持15場聯賽不敗,包括近5場全勝。不過,A米近兩次對薩斯索羅都輸波,國米只要贏到森多利亞仲有價講,衞冕又唔一定絕望。
值得一提,AC米蘭奪得2010/2011年球季意甲冠軍,當年亞軍、季軍分別係國米同拿玻里,今季隨時又會歷史重演。
般尼列斯聯護級打崩頭
諾域治同屈福特篤定降落英冠,英超煞科日將決定降班最後一席,亦係般尼同列斯聯護級最後機會,邊隊最後逃出生天,鬥埋今輪就知。
般尼煞科日主場惡鬥紐卡素,護級成功嘅「喜鵲」獲沙特財團入主兼冬窗換血後實力大增,今仗更有前鋒基斯活特倒戈,因此般尼要擊敗呢支「全球最富有球隊」難度甚高。
列斯聯飽受傷兵困擾下戰績大倒退,「狂人主帥」比爾沙3月被炒,換上馬殊執教後成績稍有改善,煞科日作客對賓福特,雖然對手冇嘢爭,但列斯聯要喺作客情況下搶分亦唔容易。
黃潛爭踢歐戰追擊巴塞
西甲皇馬提前重奪聯賽冠軍,歐聯及歐霸參賽球隊亦已確認,不過今屆歐聯大放異彩嘅維拉利爾,仲要為爭奪來屆歐協聯入場券努力。
「黃色潛水艇」繼2005/2006賽季之後再次闖入歐聯4強,不過球隊始終唔係豪門班底,陣容深度一般,歐戰超水平發揮嘅背後,球隊亦焗住要犧牲聯賽成績。維拉利爾最後一輪必須要擊敗勁旅巴塞隆拿,先可以確保積分榜第7名,以換取來屆歐協聯外圍賽資格。
至於卡迪斯、馬略卡同CF格蘭納達3支下游分子,將會喺煞科日出擊,就睇吓邊兩隊可以上岸,逃過餘下一個降班席位。
麥巴比主場告別PSG
法甲豪門巴黎聖日耳門(PSG),今季眾望所歸聯賽衞冕成功,不過對PSG嚟講,攞法甲冠軍已經係基本要求,而本地賽事嘅成就,似乎無助挽留陣中王牌前鋒基利安麥巴比。喺皇家馬德里積極游說下,呢位法國世盃奪冠功臣,已經非常接近轉戰西甲,嚟緊煞科日PSG主場對梅斯,或會成為基利安麥巴比嘅告別戰。此外,下屆邊隊攞到歐聯入場券仍然未知之數,摩納哥、馬賽同雷恩三大前列分子,目前正鬥得難分難解,最後一輪必定會爭崩頭。