8000萬新星拒絕曼聯　原因無法反駁

足球博彩神器，每日重心提供盡在《彩報》：http://win.on.cc/football/　

曼聯來季面臨重組，新帥坦哈格接手有新氣象，但由於痛失歐聯資格，想簽頂級球員難度不少，各大傳媒報道，受歐洲各豪門爭奪嘅賓菲加新星達雲紐尼斯，已明確表示不會加盟冇份踢歐聯嘅球隊，曼聯想簽佢幾近不可能。

達雲紐尼斯年僅22歲，係烏拉圭國腳，今季上陣41場攻入34球及4個助攻，葡超第3名、歐聯8強，賓菲加將佢標價8000萬歐元，仍然廣受各大豪門關注，當中拜仁慕尼黑同巴黎聖日耳門都會出手爭奪，因兩隊都視佢為羅拔利雲度夫斯基及基利安麥巴比嘅代替品。

法國傳媒報道，達雲紐尼斯明確表示，不會考慮沒有歐聯資格嘅球隊，佢嘅目標係加盟一支成績穩定，每年都有份踢歐聯嘅球隊，當然仲要豐厚嘅薪酬，環顧歐洲，只有拜仁同PSG可以滿足佢。

至於曼聯，失去歐聯資格後，相信未來一段時間會不停「食檸檬」，今夏增兵會有唔少困難。