【官宣】迪馬利亞結束7年PSG生涯　下站意甲？

最強博彩盤路過關神器《串績王》：http://win.on.cc/football/　

法甲冠軍巴黎聖日耳門(PSG)正式宣布，翼鋒迪馬利亞將於今夏約滿離隊，結束7年法甲生涯，盛傳呢位34歲阿根廷國腳可能以自由身加盟意甲勁旅祖雲達斯。

PSG發表聲明話：「我哋向迪馬利亞致敬，佢身披紅藍球衣7個球季，為球隊奪得18個冠軍，迪馬利亞2015年夏天來到巴黎，確立進攻右翼地位，首季為球隊射入15球及25次助攻，佢效力巴黎聖日耳門7季上陣294場，入91球及111次助攻，晉身球會傳奇球員行列。」

巴黎聖日耳門會長艾卡理化大讚迪馬利亞係球隊崛起嘅功臣，擁有卓越專業精神，球迷永遠記得佢。周日(22日)凌晨法甲煞科戰巴黎聖日耳門主場對梅斯，將成為迪馬利亞嘅告別戰。

據悉，原本迪馬利亞希望續約，但PSG計劃換血，放走老將，最終無法達成續約協議。不過，迪馬利亞仍然獲得唔少球會垂青，祖雲達斯希望簽入佢，提升球隊側擊力，為射手杜辛華荷域創造更多入球機會。