曼聯輸波幸保歐霸席位 坦哈格睇到擰晒頭

2022年05月23日 11:45
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
曼聯兩大死敵曼城同利物浦為冠軍打生打死,「紅魔鬼」喺煞科日就幾乎連歐霸盃席位都保唔住,佢哋作客0比1輸畀水晶宮,全靠白禮頓喺另一邊反勝韋斯咸,先至可以保住第6名位置。曼聯新帥坦哈格今場首度入場觀戰,但就喺被影到幾次睇到擰晒頭,似乎今個夏天有排執。
曼聯煞科戰前領先韋斯咸2分,要贏波先確保歐霸盃資格,但今仗37分鐘就被韋費特沙夏攻陷,而且喺C朗拿度缺陣下無力入波,最終輸0比1。慶幸嘅係,韋斯咸喺另一仗半場領先白禮頓下,下半場連失3球輸1比3,「紅魔鬼」得以保住歐霸盃參賽資格,而韋斯咸就會出戰歐協聯。
荷蘭教頭坦哈格今仗首度入場,不過全程睇到黑晒面,半場期間同球迷合照亦「笑唔出」,著名記者Sam Pilger表示:「坦哈格喺包廂內多次睇到擰晒頭,對阿歷士迪尼斯嘅表現特別不滿。」曼聯輸埋煞科戰,係球隊自1981年以來首次聯賽作客6連敗;今季曼聯得失球差為0,亦係自89/90球季(-1)以來首次拎唔到正數。