維拉利爾擊敗巴塞　搶歐協聯資格

最強博彩盤路過關神器《串績王》：http://win.on.cc/football/　

西甲周一(23日)凌晨煞科，喺冠軍、歐聯同歐霸資格都大局已定下，焦點落喺歐協聯入場券爭奪上，結果維拉利爾作客2比0擊敗巴塞隆拿，壓倒畢爾包排喺第7位，來季得以進軍歐洲賽。至於CF格蘭納達主場同愛斯賓奴悶和0比0後，只能排尾3落得降班命運。

維拉利爾賽前只係領先畢爾包1分，今場作客魯營決心十足，41分鐘就憑艾方素柏祖沙先開紀錄，去到55分鐘巴塞隆拿嘅艾達馬查奧爾解圍失誤，直接「助攻」摩西斯高美斯再入1球，維拉利爾最終贏2比0，順利拎到歐協聯參賽資格。

降班形勢方面，煞科戰前馬略卡、卡迪斯同CF格蘭納達3隊都身陷險境，最終馬略卡同卡迪斯喺生死戰齊齊贏波，反而原本形勢最好嘅CF格蘭納只能夠同愛斯賓奴悶和，最終只累積38分，陪埋艾拉維斯同利雲特一齊降班。