失落英超照贏哥帥 高普膺雙料最佳領隊

2022年05月25日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
利物浦雖然喺英超爭霸輸畀曼城,不過領隊高普嘅能力仍然獲得一致肯定,周三(25日)凌晨獲LMA(英格蘭聯賽領隊協會)選為年度最佳領隊,同時亦被選為英超最佳領隊,喺歐聯決賽前先拎「雙料最佳」,為球隊注下強心針,高普喺費格遜手上領獎嗰陣就揚言,要拎歐聯冠軍作為失落英超嘅補償。
喺倫敦舉行嘅LMA頒獎禮星光熠熠,曼聯傳奇費格遜、英格蘭領隊修夫基都有出席,不過主角毫無疑問係高普,今季已經帶領利物浦拎到英聯盃同英足盃冠軍嘅佢,繼2020年後第2度獲選年度最佳領隊,呢個獎項係由全英國所有領隊投票選出,地位崇高,費格遜曾5度得獎係紀錄保持者,高普今次第2度得獎,亦同雲格、哥迪奧拿及郭甫睇齊。
高普得獎後表示:「我有啲緊張,英超結局對利物浦唔係最好,但我哋已經克服咗,當你得到呢個獎(最佳領隊),一係你係個天才,一係你有一隊世界最佳嘅團隊幫手,我今日同埋4個教練一齊嚟頒獎禮,佢哋知道我有幾欣賞佢哋。」
負責頒獎嘅費格遜同高普更有一段有趣對答,費Sir宣布高普當選後表示:「12年前我見到高普,叫佢要去教一間有歷史嘅球會,或者當時我應該叫佢去教斯肯索普。」高普之後亦搞笑回應:「我完全唔知費格遜講緊乜嘢......」
另外,高普同時擊敗哥迪奧拿、韋拉、艾迪侯域,獲球迷投票選為英超年度最佳領隊,同樣係呢位德國主帥第2次得獎,佢表示依家最大目標係歐聯決賽:「今個球季非常神奇,而且呢個星期就會結束,我哋有幾日時間決備歐聯決賽......失落英超只會增加我哋贏歐聯冠軍嘅決心。」