孫興民帶金靴返國 食住個勢推個人品牌

2022年05月25日 13:01
東網電視
更多新聞短片
最強博彩盤路過關神器《串績王》:http://win.on.cc/football/ 
新鮮出爐英超神射手孫興民,周二(24日)帶同英超金靴獎座英雄式返國,喺機場現身獲大批球迷到場支持,一身文青造型嘅「老孫」亦鞠躬19次答謝球迷,而佢嚟緊一段長時間都會留喺南韓,先為國家隊「地獄集訓」備戰6月3場熱身賽,之後又會為熱刺喺南韓踢季前熱身,而且仲準備食住個勢推出個人品牌,認真識玩。
孫興民成為亞洲史上首個英超神射手,即時成為南韓人氣王,佢周二喺仁川國際機場現身,現場粉絲即瘋狂尖叫,着白T牛仔褲兼戴眼鏡嘅孫興民亦不下19次鞠躬答謝。原來孫興民今次件T恤,亦佢自己新創建品牌NOS7嘅產品,消息指佢已申請為NOS7註冊商標,包括衣服、鞋、帽、飲品、通訊設備等15個範疇,預計6月17日正式發布。
呢位熱刺前鋒嚟緊一段日子會留喺南韓,但亦非常忙碌,佢日前入選南韓最新一期國家隊名單,準備6月份連踢對巴西、智利同巴拉圭3場熱身賽,領隊保羅賓圖更表示集訓會相當難頂:「今次集訓會喺我上任以來最艱苦嘅一次,我哋短時間內要面對3個好強嘅對手,為解決球隊嘅問題,我有需要咁做。」熱刺喺7月份亦會飛去南韓踢季前熱身賽,期間會對FC首爾同埋西甲勁旅西維爾。