「耶穌仔」做爸爸　暗示可能離開曼城

最強博彩盤路過關神器《串績王》：http://win.on.cc/football/　

「耶穌仔」加比爾捷西斯雙喜臨門，繼協助曼城奪得英超冠軍之後，自己亦首次榮升做爸爸。不過，呢位25歲巴西國腳自爆前途未明，似乎暗示有可能離開曼城。

加比爾捷西斯缺席日前曼城巴士勝利巡遊，當時英國傳媒指佢有「重要家事」，所以未能現身，原來呢位射手係要陪女友分娩。囡囡順利出世之後，佢急不及待上載一張BB手握父母手指嘅相片上社交網，話：「我哋生命中最美好嘅一日。」

盛傳獲得阿仙奴及熱刺垂嘅加比爾捷西斯，去向亦備受關注，佢日前話：「關於我嘅未來，仲未肯定，但已經向曼城及經理人表達我嘅意願，放假期間我會決定自己嘅前途。」

曼城簽入挪威射手艾寧夏蘭特之後，加比爾捷西斯上陣時間可能會減少，加上阿仙奴領隊阿迪達希望收購前鋒，並睇中「耶穌仔」，佢下季隨時會入「廠」。