拜仁執到寶　免費簽入阿積士鐵衞

最強博彩盤路過關神器《串績王》：http://win.on.cc/football/　

德甲冠軍拜仁慕尼黑宣布，免轉會費簽入今夏恢復自由身嘅阿積士右後衞馬沙拉奧，雙方簽約至2026年。

拜仁行政總裁簡尼話：「針對球隊比較弱位置，簽入馬沙拉奧令陣容更加強大，有足夠實力挑戰下季各項錦標，好開心可以同馬沙拉奧合作，希望未來幾年，可以同佢一齊贏得更多獎盃。」

馬沙拉奧話：「從第一次同拜仁方面傾加盟開始，就有一種非常好嘅感覺，好高興可以轉投歐洲最大球會之一，拜仁剛完成德甲10連冠，亦係下屆歐聯爭標熱門，我認為可以喺呢度奪得好多冠軍。」

現年24歲嘅馬沙拉奧喺荷蘭出世，屬於阿積士青訓產品，2018年首次為一隊上陣，至今總共披甲136場入10球，協助阿積士捧過3次荷甲及2次荷蘭盃冠軍，巴塞隆拿原本都想簽入馬沙拉奧，但最終拜仁爭贏。

馬沙拉奧有荷蘭及摩洛哥雙重國籍，佢已揀代表摩洛哥國家隊比賽。