西維爾「退貨」　安東尼馬迪爾返曼聯

最強博彩盤路過關神器《串績王》：http://win.on.cc/football/　

曼聯前鋒安東尼馬迪爾近年表現低迷，今年1月外借西維爾希望可以重振雄風，不過佢喺西甲仍然冇乜起色，西維爾會長日前宣布「退貨」，唔會簽入呢位法國前鋒，意味安東尼馬迪爾將會回歸曼聯。

自從C朗拿度加盟後，安東尼馬迪爾上陣機會大大減少，1月更同蘭歷克反晒面咁離隊，但佢外借西維爾嘅發展一樣唔掂，受到傷患同狀態影響，半季上陣12次只入1球。西維爾喺呢次借用中，要支付佢24萬鎊周薪當中40%人工，球會認為物非所值，會長卡斯杜宣布：「安東尼馬迪爾會返去曼聯，我哋為佢付出咗一大筆金錢，但效果唔好，而且佢又經常受傷，西維爾唔會選擇將佢買斷。」

26歲嘅安東尼馬迪爾仍然係當打之齡，好消息係蘭歷克已經唔再係曼聯領隊，呢位法國國腳將要喺季前熱身爭取表現，博取新帥坦哈格嘅歡心。