麥巴比私下嘲笑尼馬　兩人關係破裂

足球博彩神器，每日重心提供盡在《彩報》：http://win.on.cc/football/　

巴黎聖日耳門(PSG)雖然成功同球星基利安麥巴比續約，但同時存在內訌隱憂，法國《隊報》爆料，指麥巴比經常嘲笑尼馬，兩人關係已經破裂，由於呢位法國國腳已成為PSG靈魂人物，球會可能今夏出售尼馬，避免內亂影響球隊下季表現。

尼馬上年同PSG續約至2025年，但由於佢狀態一直欠佳，並經常受傷，令球會對於呢位30歲巴西國腳失去耐性，唔再視佢為非賣品。法國《隊報》更加指基利安麥巴比經常喺尼馬背後，嘲諷對方力有不逮，兩人關係甚差。

最關鍵係PSG班主卡塔爾投資局都不滿「派對動物」尼馬嘅生活方式，進一步增加出售佢嘅可能性。

不過，PSG要為尼馬搵買家，並唔容易，因為呢位前鋒年薪高達5,000萬歐元，難有球會願意出高薪簽入1位走下坡嘅球員。

最大機會接手簽尼馬嘅球會，可能只有英超「新土豪」紐卡素，問題係尼馬唔想加盟一支冇得踢歐聯嘅球隊，令呢單「世紀轉會」難成事。