添巴經理人現身曼聯辦公室　入魔好事近

最強博彩盤路過關神器《串績王》：http://win.on.cc/football/　

曼聯今夏轉會以中堅為首要目標，據荷蘭《電訊報》爆料，阿積士中堅祖利安添巴嘅經理人，日前嚟到曼聯嘅倫敦辦公室進行斟介，相信成事機會極大，預計轉會費約4,300萬鎊，呢位20歲荷蘭國腳將成坦哈格第1個收購。

荷蘭《電訊報》消息指，祖利安添巴正隨荷蘭備戰歐國聯，但佢嘅經理人就負責處理轉會，日前飛去倫敦同曼聯代表洽談，曼聯主帥坦哈格已明確揀佢作為中堅收購主要目標；更「巧合」嘅係，添巴嘅經理人公司Forza日前喺社交網貼出一場機場相片，寫上「完成交易時間...」令球迷相信呢位小將轉會已進入最後倒數。

祖利安添巴同阿積士仲有2年合約，如果佢唔續約嘅話，下年進入最後1年合約下身價會大幅縮水，就好似賴恩格雲貝治今季情況一樣，阿積士唔想「歷史重演」，所以會同意喺今夏將佢賣走，目前叫價為4,300萬鎊，對曼聯嚟講絕對係可以接受嘅價格。