【官宣】干地愛舊將　熱刺簽入比列錫

最強博彩盤路過關神器《串績王》：http://win.on.cc/football/　

英超勁旅熱刺正式宣布，免轉會費簽入今夏恢復自由身嘅國際米蘭翼鋒比列錫，雙方簽約2年。呢位33歲克羅地亞國腳效力國際米蘭期間，曾經同主帥干地一齊奪得2020/21年度意甲冠軍，兩人再次合作，挑戰下季英超錦標。

比列錫雖然年紀唔細，但寶刀未老，今季為國際米蘭各項賽事上陣49場入10球及9次助攻，包括意大利盃決賽加時，個人梅開二度協助國米以4比2擊敗祖雲達斯，奪得冠軍，但由於國米遲遲唔肯同佢續約，呢位翼鋒一怒之下走人。據悉比列錫同熱刺簽約2年之後，年薪達到600萬歐元。

干地執教熱刺後，鍾情引入意甲兵，包括冬季簽入2位祖雲達斯中場古路施夫基斯、賓坦古亞，其中瑞典國腳古路施夫基斯屬於借用性質，佢今季英超上陣18場入5球，並經常有助攻，熱刺唔排除會買斷佢。