港隊新生代！余在言淺談專業之領悟與反思

年輕小將要發展成一位大熟大勇的球員，天份和專業性兩者之間缺一不可。在世界球壇之中，因欠缺專業而斷送前程，白費天份的球員例子比比皆是。今集專訪主角、效力標準流浪的余在言（Jesse），淺談他對職業球員專業性的看法，以及他人對自身的期望。 圖／文：黃雋謙

20歲的Jesse，12歲開始在香港巴塞足球學校學法，曾跟隨過朱志光、朱兆基等現役教練。14歲後，他轉到車路士足球學校（香港），並隨隊贏盡各個年齡層的青年賽事。「細個冇諗過會喺香港踢職業，當初諗住只係一個興趣，跟住就過外國讀書，喺嗰度踢埋波。」他說。

直至中學畢業後，他赴加拿大升學一年，但因為水土不服，加上校園生活分心，他在大學校隊的發展並不如意，遂下定決心回流，轉讀香港大學：「一來想靠近多啲家人；二來喺嗰邊少踢，好掛住細個成日有得比賽，因為我一直都係好有爭勝心嘅人，想『Be the best I can be and be better than everyone else』（成為最好的自己；成為比所有人更優秀的人）。」

在這裏先描述一下Jesse的背景，雖然成長於香港家庭，但他自小於國際學校讀書。英皇佐治五世學校畢業的他不太會讀寫中文，說話時中英夾雜，言談間亦流露着他那「鬼仔」的性格：「始終喺國際學校畢業，文化點都有啲唔同，有時同隊友相處我會靜啲，因為我唔知道應該點樣交際，不過喺足球生涯入面都識咗好多朋友。」

由明日之星化身為天皇巨星抑或褪色金童，往往只是一線之差，而作為職業球員的專業性，在當中發揮關鍵作用。上季在愉園出道，全季卻未得到太多表現機會，假如「快活谷」是他足球員生涯的起點，那麼他的起步則一點都不順利：「自己其實都好矛盾，因為都盡晒力，但付出咗嘅嘢好似冇得到回報。」他接着說，這一年的經歷反而讓他認清足球員的真實一面，而保持專業態度才能成就自己成為勝利的一位：「以前踢U隊基本上場場有得踢，而上年就畀我體會到，一個職業球員係可以遇到呢一種困境，你可能有時要爭位踢，甚至冇得踢，而球會亦都唔係奉旨規劃你嘅將來。」

今季季前在盧兆崎的介紹下，Jesse與楊迪麟、陳潤潼等前愉園球員到流浪試腳：「嗰陣時已掉低晒愉園發生過嘅事，好專注咁推動自己進步。」幸得總監李輝立和教練團賞識，他獲得流浪的收留，在港超腰斬之前獲得9次落場機會。「因為我當咗今年先係第一年喺港超踢波，所以其實好緊張，亦都知道盧均宜、林嘉緯嗰班老大哥對我哋有期望，令我有一份動力去展示畀佢哋睇，我係可以踢到。」他說。

不諳人情世故往往是年輕人的通病，面對抉擇和誘惑時難免作出莽撞的行為，傷害別人亦傷害自己。傳聞Jesse在球季停擺期間，因私下和其他球隊接觸或紀律問題，與會方的關係一度緊張。事過境遷，現時專注為香港隊效命的他，被問及事件時亦希望向會方告白：「自己喺球圈都新，好多待人處事都唔係好識處理，但現時好開心可以為流浪效力，如果下季可以繼續踢港超，希望可以有一個完整嘅球季。」年輕球員經歷過錯在所難免，但最重要是能夠從中汲取教訓作出改善，成為他想要成為的專業足球員。

【余在言Profile】

出生日期：2001年10月8日（20歲）

位置：進攻中場、翼鋒

現效力球隊：標準流浪　球衣號碼：14號

曾效力球隊：車路士足球學校（香港）青年軍、愉園

今季上陣：9場

余在言自幼是香港各級青年隊的成員，去年亦曾代表港隊出戰「U23亞洲盃」外圍賽，可惜最終以兩戰兩敗成績出局。不過最令他耿耿於懷的並非是球賽結果，而是他覺得辜負了支持者的冀望：「去邊度都唔止背負自己嘅身份，而係代表緊香港呢700萬人，雖然呢700萬人唔係人人識你，但係着得呢件波衫，就係背負香港人嘅身份，捍衞緊一啲嘢。」

Jesse今年更進一步躋身「大港腳」行列，入選25人大軍名單出戰「亞洲盃」外圍賽。對於自己拾級而上的際遇，他坦言一切「嚟得太快」：「梗係開心，但驚消化唔切，始終啱啱先開始踢，唔想人哋嘅期望為自己帶來壓力。」Jesse謂假如屆時獲派上陣，期望在場上釋放，踢出自己的足球。面對外間對這名新晉港腳質疑的聲音，Jesse決定以冷靜面對：「揀唔揀我唔係我嘅決定，但我入得嚟就會畀盡自己嘅能力，希望會多啲人支持。」