36歲占士米拿續約利物浦一年

最強博彩盤路過關神器《串績王》：http://win.on.cc/football/　

利物浦周一喺官網宣布，已同36歲嘅老將占士米拿續約一年至2023年，即係話呢位副隊長將喺晏菲路為紅軍渡過第8個球季。

占士米拿於2015年由曼城以自由身轉到利物浦，先後為紅軍贏過英超、歐聯、世冠盃、歐洲超級盃，以及上季嘅足總盃同聯賽盃，佢喺官網接受訪問時話:「我好高興可以再留多一年，我從未諗過喺利物浦上陣係理所當然，永遠都唔會咁諗。」

呢位中場球星更指自己嘅想法同教練團貼近：「最重要喺我相信自己仍然可以為球隊作出貢獻，領隊清楚我嘅想法。」佢都有提到利物浦最近失落歐聯冠軍:「上季真係超凡，雖然我哋最終未做到我哋所希望，坦白講，我哋已經盡全力，相信我哋那種飢渴會成功，喺巡遊之後那種感覺，已經係我決定續約嘅一部份，呢個係一個獨特嘅球會。」

占士米拿已經為利物浦踢咗289場，攻入26球，助攻44次；而上季落場39次1371分鐘，助攻3次。