【官宣】阿仙奴簽馬昆奴斯　組巴西三叉戟？

最強博彩盤路過關神器《串績王》：http://win.on.cc/football/　

英超勁旅阿仙奴周二(13日)官方宣布，球隊成功向巴甲聖保羅收購19歲翼鋒馬昆奴斯，據報轉會費約300萬鎊。馬昆奴斯同阿仙奴簽約5年，係「兵工廠」今夏第1簽，盛傳佢哋主要目標係曼城前鋒加比爾捷西斯，新季有望排出巴西三叉戟！

司職翼鋒嘅馬昆奴斯上年7月先殺入聖保羅一隊，唔夠1年時間已為球隊上陣41場攻入4球，包括喺南美自由盃賽事亮相，極速上位。由於佢同聖保羅嘅合約早前被裁定違規，聖保羅為免人財兩失，先至被逼將佢賤價賣走，阿仙奴總監伊度表示：「好開心完成轉會，我哋留意咗佢好耐，佢係球隊嘅未來。馬昆奴斯嚟緊會參加球隊季前備戰，呢度已經係佢屋企，期待佢會繼續進步。」

伊度嘅「巴西網絡」向來可靠，阿仙奴3年前喺巴西第4級聯賽球隊簽入17歲嘅加比爾馬天尼利，後者依家已成為巴西大國腳，據報阿仙奴今夏目標係收購加比爾捷西斯，如果成事嘅話，有機會打造加比爾馬天尼利、加比爾捷西斯同馬昆奴斯嘅森巴鋒線。