迪基亞反勝！甸恩軒達臣答應投森林

足球博彩神器，每日重心提供盡在《彩報》：http://win.on.cc/football/　

據英國《每日郵報》報道，英超新升班球隊諾定咸森林，已傾掂以「先借後買」方式羅致曼聯門將甸恩軒達臣，呢位25歲英格蘭門將前季一度搶走迪基亞嘅正選位置，不過最終都係黯然敗走。

諾定咸森林升上英超後，喺升班附加賽成為功臣嘅門將拜斯森巴即要求轉會，球隊亦第1時間物色代替人選，據報佢哋已同曼聯達成協議，先借用甸恩軒達臣1年，借用期滿後有權以2,000萬鎊轉會費買斷，甸恩軒達臣為尋求上陣機會，亦好樂意轉投森林。

曼聯同森林關係良好，上季「紅魔鬼」就曾外借中場占士加拿畀森林，成為森林升班重要棋子，不過英超規例列明，2間相同英超球會唔可以外借多個1人，如果森林成功借用甸恩軒達臣，占士加拿就冇得繼續外借留隊，除非森林將佢正式收購。