寸王愛舊將　力邀巴利加盟羅馬

最強博彩盤路過關神器《串績王》：http://win.on.cc/football/　

羅馬主帥摩連奴愛舊將，繼早前簽入曾於車路士及曼聯合作過嘅「契仔」尼曼查馬迪之後，再出手力邀另1位舊部加里夫巴利助陣。根據意大利《羅馬體育報》爆料，「寸王」遊說呢位32歲威爾斯國腳加盟羅馬，如果成事，呢對昔日熱刺將帥組合將再次拍住上。近年多位失意球星轉戰意甲，都有出色表現，可能係巴利翻身嘅好機會。

加里夫巴利今夏約滿離開效力9年嘅皇馬，去向備受關注，曾傳出卡迪夫城、基達菲有意簽入呢位翼鋒，巴利都唔感興趣。不過，摩連奴出手情況完全唔同，2人曾於2020/21年球季合作過，當時仲教緊熱刺嘅摩連奴向皇馬借用巴利，效果相當不俗，巴利重返呢支倫敦球隊，上陣34場入16球，成為佢自2017/18年球季後，個人單季最多入波一季。

「寸王」認為巴利仍然具備級數，可以取代拒絕續約嘅米希達利恩，成為羅馬進攻主力，據悉羅馬願意向巴利提供一份700萬歐元年薪嘅2年合約。

加里夫巴利早前表示，依家踢波已經唔係為錢，而係希望有更多上陣時間，保持狀態為威爾斯出戰今屆世界盃決賽周，跟隨摩連奴搵食，應該會獲得重用，滿足到佢要求。

摩連奴一向有點石成金嘅能力，上季簽入車路士後備前鋒譚美阿巴謙，呢位英格蘭國腳立即獲得重生，為羅馬上陣53場入27球，成為奪得歐協聯冠軍功臣，有成功例子畀巴利參考，相信佢更加有信心轉戰意甲。

除咗尼曼查馬迪、加里夫巴利之外，摩連奴亦有意簽入2位前曼聯舊部連格、達洛治，打造「寸家軍」，真係星光熠熠。

事實上，羅馬由摩連奴執教一季後，號召力急升，球會新一季季票已經賣出33,500張，創出自2004年以來新高，預料下季平均每場會有6萬人入場，如果簽埋加里夫巴利等球星，相信會進一步刺激票房。