曼聯增兵又受挫　艾歷臣拒絕成「魔」

最強博彩盤路過關神器《串績王》：http://win.on.cc/football/　

曼聯新領隊坦哈格躊躇滿志希望為球隊打造一個強大陣容，但卻處處碰壁，收購目標球員都對成「魔」有保留，最新消息指基斯甸艾歷臣亦拒絕加盟紅魔鬼，因為呢位30歲丹麥國腳希望留喺倫敦生活，所以佢一係同賓福特續約，一係重投熱刺。

基斯甸艾歷臣克服心臟問題，今年1月加盟賓福特簽約半年，並有不俗表現，11次上陣創造5個入球，佢今夏恢復自由身，坦哈格希望簽入呢位中場，提升進攻組織力。

不過英國《太陽報》指艾歷臣好喜歡倫敦生活，傾向選擇當地球會，熱刺主帥干地一直有意邀請佢回巢，加上有歐聯踢，反觀曼聯只能踢歐霸盃，論吸引力比唔上熱刺。

事實上，曼聯近期已經唔係第一次被目標人物拒絕，包括賓菲加射手達雲紐尼斯選擇加盟利物浦，阿積士後衞祖利安添巴仲未答應來投，令紅魔鬼增兵進度停滯不前。