都是你的錯?後費格遜年代點換都一樣...

2022年06月21日 17:00
東網電視
更多新聞短片
費格遜2013年退休後,曼聯經歷多次換帥,無論係費Sir欽點嘅莫耶斯,抑或星級名帥摩連奴及尹戈爾,甚至「現代足球教父」蘭歷克接手,結果都係一樣,上任初期被寄予厚望,最後落得受盡屈辱黯然離開嘅下場。諷刺嘅係呢幾位「後費格遜年代」主帥,脫「魔」後反而帶領所屬球隊獲得佳績,可見「紅魔」長期衰落,唔關呢班棄帥事,佢哋都係無辜嘅。
●兩度出手拯救錘仔 莫耶斯實幹有回報
2013年費格遜決定退休後,欽點莫耶斯做接班人,結果曼聯一年間由聯賽冠軍跌落第7名,當季64分亦打破當時球隊喺英超嘅最低分紀錄,莫耶斯慘被球迷冠以「天才」嘅諷刺稱號。
獲費Sir欽點反成負累
莫耶斯執教愛華頓期間以「實幹」見稱,但過到曼聯後冇時間畀佢實踐,更重要係費Sir當時留低一個年紀偏大兼巔峰已過嘅陣容,加上要喺極度成功嘅費Sir手上接掌呢架「沉船」展開重建,當中困難可想而知,最終短短一年貨仔就被炒魷。
經歷「曼聯之劫」後,莫耶斯教過皇家蘇斯達同新特蘭都冇乜表現,2017年臨危受命執教陷入降班危機嘅韋斯咸,成功帶領球隊護級,但半年合約完結後並冇簽約。2019年「錘仔幫」再捲入降班漩渦,莫耶斯再度出手打救,又一次幫球隊成功護級,自此成為「錘仔」主帥,除企穩陣腳外,近兩季更榮升歐戰分子,上季殺入歐霸盃4強,成績驕人。
●蘭歷克教奧地利逼搶重現
「費Sir契仔」蘇斯克查被炒後,蘭歷克上年12月出任曼聯看守領隊,呢位德國名帥被稱為「現代足球教父」、「高普師傅」,以逼搶戰術聞名。蘭歷克執教曼聯初期,曼聯球員確實踢出較為積極,但好快無以為繼,因為「紅魔」嘅所謂逼搶只得「半桶水」,成績每況愈下,最後6場聯賽作客居然全敗,包括恥辱性吞白禮頓4蛋,埋單58分亦成為球隊喺英超史上最低分紀錄,衰過隔離個莫耶斯。
做替工冇實權非戰之罪
原本轉任技術顧問嘅蘭歷克最終亦同曼聯分手,專心執教奧地利。蘭歷克敗走奧脫福其實早注定,一來佢只係「替工」冇實權,球員唔會聽佢支笛,二來王牌C朗年紀唔細,唔適合踢逼搶戰術,兩人亦發生不和導致軍心散漫,球隊季尾變成「無人駕駛」。反觀蘭歷克率領奧地利如魚得水,歐國聯首仗即以3比0大炒克羅地亞,其後又打和世盃冠軍法國,用成績證明佢嘅戰術冇問題。
●歐洲賽大滿貫摩連奴「活得比你好」
摩連奴絕對係「後費格遜時期」最佳曼聯領隊,喺2016年上任,當季即奪社區盾、英聯盃及歐霸盃,翌季亦獲聯賽及英足盃亞軍。但去到2018/19年球季,曼聯踢完頭17輪後已落後榜首19分,加上「寸王」同保羅普巴等主力不和,保守戰術亦被球迷嫌棄,最終2018年12月「雙紅會」不敵利物浦後,終於落鑊。
里奧費迪南先批評後耍冧
摩連奴之後執教熱刺都失敗收場,上年重返意甲接手羅馬,雖然聯賽戰績一般,但喺首屆歐協聯成功封王,佢成為首位囊括歐聯、歐霸盃及歐協聯3大賽事冠軍嘅教頭,一洗污名。
「寸王」之前講過帶領曼聯拎到聯賽亞軍,已經屬執教生涯重大成就之一,強調時間會證明一切,當時曾被史高斯及里奧費迪南等名宿批評佢死撐,認為曼聯只得亞軍都係恥辱。如今證明摩連奴手握呢班人腳屈居曼城之後,已屬難能可貴,佢離開後曼聯亦未再嘗捧盃滋味,難怪里奧知衰耍冧。
●復興橙軍尹戈爾唱衰冇停過
尹戈爾喺2014年開始執教曼聯,2015/16年球季為球隊贏得英足盃,點知之後居然被辭退,令呢位荷蘭老帥懷恨在心,喺唔同場合搵機會攻擊「紅魔」,亦因為佢嘅小器行為,被球迷冠以「方丈」稱號。
勸同鄉入「魔」要三思
年屆70歲嘅尹戈爾領軍功力深厚,去年歐國盃後第3度執掌荷蘭國家隊教鞭,立即率領「橙軍」奪得世盃外小組首名,闊別8年後再度進軍世盃決賽周,後期自爆領軍期間確診前列腺癌,邊抗頑疾邊帶隊,故事認真「暖心」。
一個咁有料嘅主帥,竟然被曼聯以毫不尊重嘅方式炒魷,難怪佢嬲到震懷恨在心。早前曼聯搵坦哈格執教,又打算簽入祖利安添巴及法蘭基迪莊等荷蘭兵,「方丈」當然唔放過唱衰機會,不斷冷嘲熱諷,話曼聯唔係球會而係商業機構,勸同鄉「三思」。
●總結:問題未解決坦哈格前景堪虞
曼聯問題多多,歸根究柢係高層唔識波,前CEO活華特出身商界,經常高價亂買大牌球星,開出人工亦唔合理,好似盧卡古及保羅普巴等高價加盟,交換返嚟嘅阿歷斯山齊士周薪更達50萬鎊,可惜個個冇貨交,搞到賣都賣唔出。上季季中原本搵干地頂替蘇斯克查,點知高層猶豫不決下畀熱刺截胡,白白睇住呢支北倫敦球隊拎到歐聯入場券。
更衣室爭權更趨白熱化
費格遜時期所樹立嘅嚴明紀律,依家已經蕩然無存,摩連奴在任時表示某位球員覺得自己重要過球隊;蘭歷克亦形容球員態度散漫兼權力過大,唔聽佢支笛,真係邊個教都死。隨住活華特年頭離任,荷蘭名帥坦哈格入主,改革好似走啱方向,但坦帥想買入舊部下法蘭基迪莊同祖利安添巴,暫時未見進展,有指球會高層擔心完全荷蘭化,會令到更衣室權力失衡,令收購諸多阻滯。
坦帥以鐵腕治軍,近日就警告球員要放下個人主義,操練時要同落場一樣百分百付出,點睇都似係針對王牌C朗,睇嚟「將帥內鬥」持續,曼聯更衣室冇日安寧。