文尼正式加盟拜仁：係時候接受新挑戰

最強博彩盤路過關神器《串績王》：http://win.on.cc/football/　

德國班霸拜仁慕尼黑於周三（22日）正式宣布，成功簽入30歲嘅利物浦前鋒沙迪奧文尼，並簽約到2025年，雖然未有披露轉會費金額，但據報轉會費3,510萬鎊，當中770萬鎊為獎金條款，佢對加盟拜仁好興奮，並且感謝紅軍球迷過去6年嘅支持。

由於箭頭羅拔利雲度夫斯基為咗離隊已反晒面，拜仁亦急於搵番具級數嘅前鋒取代佢，而文尼喺英超贏盡一切，希望轉換環境，因此大家一拍即合，周三正式宣布加盟。拜仁高層簡尼同沙歷咸美錫，大讚文尼係國際級球星，而文尼加盟後表示：「對於轉投拜仁，我冇一刻猶豫過，依家係迎接挑戰嘅好時機，拜仁於國際球壇取得好多成就，就算以前效力薩爾斯堡嗰陣，我都經常睇拜仁嘅比賽，我好鍾意呢間豪門。」

隨後文尼喺社交網向利物浦球迷告別：「我只想從心裡感謝你哋，過去6年我哋一齊取得令人難以置信嘅成功，我好開心能成為其中一分子。」