PSG證實邀加迪亞執教 大換血尼馬被掛牌

20220623
東網電視
更多新聞短片
最強博彩盤路過關神器《串績王》:http://win.on.cc/football/ 
巴黎聖日耳門(PSG)易帥一事如火如荼,球會班主艾卡理化周三(22日)證實,尼斯教練加迪亞係PSG新教練人選,兩間球會已就過檔細節進行談判。隨住新帥即將上任,據報PSG喺陣容、戰術上都會大執位,巴西球星尼馬已被通知唔喺球隊計劃之內,等有合適開價就會將佢賣走。
艾卡理化日前接受《巴黎人報》專訪,坦誠公開球隊換帥計劃詳情:「我哋已經同尼斯商討緊,呢個唔係乜嘢秘密,我希望可以盡快達成協議,不過都會尊重尼斯捍衞佢哋自身利益。」對於曾經瘋傳嘅目標施丹,艾卡理化就劃清界線:「好多球隊想搵施丹,包括法國國家隊,但PSG從來冇同佢傾過。」
加迪亞正式執教PSG只係時間問題,曾經同佢喺里爾合作無間嘅甘波斯,早前已落實出任PSG顧問,接掌球隊組軍同發展大權。法國媒體《Foot Mercato》爆料,甘波斯已為PSG嘅戰術、陣容重組進行大改革,包括將會以基利安麥巴比同美斯為核心改踢3-5-2,正選陣容已經冇巴西前鋒尼馬嘅位置。
報道指啱啱續約嘅麥巴比毫無疑問係重建核心,改踢3-5-2亦可以令美斯、阿舒拉夫等球員發揮所長,另外PSG已非常接近簽入葡萄牙中場域天拿同連拿度辛捷士,目標係再簽埋國際米蘭中堅史堅尼亞,同馬昆賀斯、派斯奴甘佩比組成3中堅。
重點係尼馬嘅正選位置將會不保,艾卡理化喺訪問中亦暗示:「PSG要走實務路線,唔再要浮誇、豪華嘅球員。」被問到尼馬係咪計劃之內,艾卡理化亦冇直接回應:「我哋唔會公開討論呢樣嘢,有球員嚟就有球員走,但一切都會係內部進行。」
甘波斯今夏出任PSG顧問,取代巴西總監李安納度嘅職務,甘波斯曾經出任摩納哥同里爾總監,喺摩納哥發掘出基利安麥巴比等天才新星,前季就協助里爾爆冷贏法甲冠軍,成功打破PSG嘅壟斷,而當時里爾教練就係加迪亞。