葡超貨平靚正!優質潛力股有買趁早

2022年06月23日 19:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
葡超被譽為「球壇超市」,多年來出產大量球星,既有豐富本地青訓「土產」,亦有從南美等地輸入嘅「來佬貨」。利物浦今年先後由葡超簽入兩位射手路爾斯戴亞斯及達雲紐尼斯,堪稱最佳轉會操作,令各大球會趨之若鶩,紛紛將目光投向呢個「大賣場」,依家就帶大家一齊去交易現場尋寶,搜羅「潛力股」。
●列卡度賀達
今屆歐國聯A2首場賽事,葡萄牙與西班牙踢成1比1,射入扳平1球嘅球員,就係嚟自布拉加、今屆以19個入波排葡超神射手榜第3位嘅列卡度賀達。
列卡度賀達係賓菲加嘅青訓產品,但成名卻喺布拉加。列卡度賀達職業生涯2013年喺塞圖巴爾開始,效力1年後畀馬拉加羅致,2016年布拉加借用列卡度賀達1年,直至2017年正式買斷,幫助布拉加捧走2020年葡聯盃及2021年葡萄牙盃。
歐國聯射入西班牙1球嘅賽事,係列卡度賀達自2014年9月首度入選葡萄牙大軍後,相隔超過7年,首度為國家隊上陣,佢即刻取得入球,難怪賓菲加出價1,000萬歐元斟佢回巢,不過布拉加早喺舊年已經同佢續約至2026年。德國《轉會市場》網站估計佢嘅身價為2,000萬歐元,對於好多英超球會嚟講,絕對係濕濕碎,唔知會唔有英超球會出手呢?
●拉法施華
賓菲加射手達雲紐尼斯已轉投利物浦,佢隊友拉法施華登陸英超嘅機會都好大。拉法施華啱啱一季聯賽射入8球及貢獻16次助攻,係葡超今屆助攻王,雖然已經29歲無乜再賣出去嘅投資價值,但佢創造入波嘅能力,勝在可以「即食」。
拉法施華2012年喺費倫斯出身,一年後已經被布拉加睇中,喺布拉加踢咗3年後,賓菲加就睇中佢嘅邊路個人能力,將佢收歸旗下。拉法施華踢法有費高嘅影子,踢法具侵略性,鍾意單對單挑戰對方,嘗試盤扭突破。舊年歐國盃葡萄牙分組賽頭場對匈牙利,一直老鼠拉龜,拉法施華71分鐘入替貝拿度施華即刻激活球隊,葡軍入嘅3球都係由佢喺右路發難造成,包括博到12碼以及同C朗連續兩次超靚「撞牆」。
據知英超球會狼隊想簽拉法施華,打算壯大「葡國幫」,賓菲加已從薩克達羅致大衞拿尼斯,位置及踢法同拉法施華相似,增加拉法施華離隊機會。
●域天拿
波圖自家青訓向來有一手,其中域天拿值得留意,呢位中場喺2019年喺二隊效力,去到2020年1月便「升呢」上一隊,鑑於出場機會較少,之後被借到英超最強「葡國幫」狼隊,上季回歸波圖後表現逐漸成熟,各項賽事共上陣47次,貢獻4球兼5次助攻,更3度當選葡超月份最佳球員,比早前從賓菲加高價加盟利物浦嘅神鋒達雲紐尼斯多2次,並且3次獲選葡超月份最佳中場,協助波圖成為雙冠王,唔講得笑。
域天拿係中場多面手,能勝任防中、進攻中場及邊路等位置,傳送成功率達90%,除咗已成波圖核心球員外,佢亦先後為葡萄牙青年隊,出戰U19及U21歐國盃獲得亞軍,今年3月更首度獲徵召成為大國腳,並喺世盃附決賽贏北馬其頓2比0作處子登場。
有指域天拿依家合約中有4000萬歐元買斷條款,據報法甲豪門巴黎聖日耳門打算直接用呢個價錢收購佢,睇嚟波圖都係留唔住佢。
●法蘭斯高艾雲尼臣
波圖專喺南美洲尋寶,尤其鍾意森巴兵,出身於巴甲老牌球隊富明尼斯嘅法蘭斯高艾雲尼臣,喺2020年9月以880萬歐元轉投波圖,1個月後首度披甲對基維辛迪,立即攻入奠勝士哥。雖然艾雲尼臣之後被調落二隊,但5仗狂轟6粒,再被提升上一隊。
經過首季適應後,艾雲尼臣上季開始擔正,加上路爾斯戴亞斯季中改投利物浦,令佢更不可或缺,單計聯賽30仗便有14球進帳,成為陣中次席射手,並且喺葡盃7次上陣入7粒,係自1997/98球季球隊名宿兼巴西中鋒查度之後,另一位於呢項盃賽攻入6球或以上嘅波圖球員,乃球隊榮膺雙冠王嘅重要功臣。艾雲尼臣於1月當選葡超月份最佳前鋒,除咗大勝比蘭倫斯4比1之役首次喺聯賽戴帽外,險勝馬里迪莫2比1嘅乖巧後腳入波,更獲選1月葡超最佳入球,有指佢身價已上升到2200萬歐元,絕對係抵買潛力股。
●柏祖干卡維斯
士砵亭喺2020年1月將中場般奴費南迪斯賣畀英超球會曼聯後,即刻用平價簽入咗柏祖干卡維斯,作為般奴費南迪斯嘅接班人,呢位23歲進攻中場嘅表現,再次證明士砵亭高層嘅眼光相當獨到。
柏祖干卡維斯加盟士砵亭嘅第1季,即以23個入波成為葡超神射手,同時帶領球隊奪得葡超聯賽冠軍,兼且當選葡超最佳新人,令士砵亭球迷立即忘記般奴費南迪斯。
雖然上季柏祖干卡維斯表現有所跌Watt,不過充滿創造力嘅佢,仍然係唔少歐洲豪門嘅獵物,士砵亭亦喺上年年底決定提前同佢續約,將合約內嘅買斷費由6,000萬歐元加至8,000萬歐元,呢個金額對於一啲能力被視為可以媲美般奴費南迪斯嘅新星嚟講,絕對屬於「合理範圍」,柏祖干卡維斯去歐洲頂級球會發展,相信只係時間問題。
●達利美
亞洲前鋒近年喺歐洲打出名堂,孫興民今年拎到英超金靴前,其實伊朗射手達利美喺2019/20球季已經成為葡超金靴,而且佢當時效力嘅球會只係里奧艾維,令佢做神射手嘅震撼度進一步提升。達利美成為神射手後即被班霸波圖招攬,繼續保持極高入球率,上季葡超又轟入20球,僅次於以1億歐元轉投利物浦嘅達雲紐尼斯。
達利美雖然係亞洲人,但擁有1米87嘅龐大身形,而且射術相當高超,前季歐聯8強對車路士嘅倒掛金勾入波,就令球迷印象深刻。早前葡萄牙《紀錄報》曾報道,意甲勁旅AC米蘭有意用2,000萬歐元收購達利美,如果消息屬實,呢個可能係29歲嘅達利美最後一個征戰5大聯賽機會。