勝利巡遊恐怖意外　基羅納球員救靚女記者

足球博彩神器，每日重心提供盡在《彩報》：http://win.on.cc/football/　

透過附加賽拎到升上西甲資格嘅基羅納，日前舉行巴士勝利巡遊，不過慶祝期間就發生恐怖一幕，球隊嘅靚女攝影記者唔小心喺巴士上層跌出車外，喺千鈞一髮之際，阿拿奧馬天尼斯等基羅納球員及時將佢拉住，由車外拉番入去，相當驚險。

基羅納喺升班附加賽3比1贏特內里費後，球隊舉行勝利巡遊慶祝升上西甲，靚女攝記Nuri Margui就喺上層捕捉球員歡樂畫面，點知喺車尾嘅佢突然失平衡向後跌倒，成個人已經跌出巴士外面，附近警察見到亦衝過去準備將佢接住，但阿拿奧馬天尼斯等幾名球員反應快，捉住佢隻手同腳，成功將Nuri Margui救番。

死過翻生之後，Nuri Margui亦喺IG輕鬆回應網民話佢全程冇放開部相機：「無論發生咩事，永遠唔好放低部相機！」