利物浦願意出售沙拿 皇馬有意接貨

20220625
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
利物浦繼出售沙迪奧文尼畀拜仁慕尼黑之後,又準備賣走另1位鋒線主力穆罕默德沙拿,根據英國《太陽報》爆料,紅軍同沙拿嘅續約談判陷入僵局,會方為免呢位埃及國腳明夏約滿自由身離隊,造成人財兩失,唔排除提早今夏以6,000萬鎊出售佢,利物浦嘅「歐聯宿敵」皇馬有意簽入呢位英超神射手。
穆罕默德沙拿嘅續約問題已經糾纏多時,有傳佢要求加一倍人工,達到40萬鎊周薪,比現時隊內最高薪球員華基爾雲迪積克多16萬鎊,令會方難以接受,雙方談判陷入僵局。
時間上明顯對利物浦不利,因為一旦拖到明年1月,沙拿就可以同其他球會傾加盟事宜,所以紅軍必須今夏決定沙拿去留問題,若然無法同佢續約,就一定要出售呢位射手,情況就如早前賣走拒絕續約嘅沙迪奧文尼一樣。
沙拿效力利物浦5季,各項賽事上陣254球入156球,協助球隊贏盡英超、歐聯、英聯盃、英足盃、歐超盃、世冠盃等各大錦標。雖然沙拿已經30歲,但狀態仍然當打,上季英超入23球,同孫興民並列射手榜一哥,所以紅軍唔想賤賣佢,將佢標價為6,000萬鎊。
事實上,利物浦早前以8,500萬鎊收購賓菲加射手達雲紐尼斯,被指係為放走沙拿做準備,如果紅軍成功以6,000萬鎊出售佢,加上之前從沙迪奧文尼身上獲得嘅3,500萬鎊轉會費,正好可以抵消買達雲紐尼斯嘅支出有餘。
據悉,皇馬最有興趣收購穆罕默德沙拿,因為呢支上季西甲及歐聯冠軍未能簽入法國前鋒基利安麥巴比,正在物色其他射手,若然紅軍出售沙拿,雙方有望一拍即合。
值得一提,利物浦曾於2018及今年歐聯決賽不敵皇馬,其中2018年決賽,沙拿被當時皇馬中堅沙治奧拉莫斯整傷,留下不可磨滅陰影,佢今屆歐聯決賽前夕,曾經揚言要報仇擊敗皇馬,但最後都係功敗垂成,估唔到下季可能成為「銀河艦隊」一員。