曼聯加碼奏效　6.30前簽到法蘭基迪莊

最強博彩盤路過關神器《串績王》：http://win.on.cc/football/　

曼聯距離今夏第一簽又行近一步，西班牙《每日體育報》爆料指紅魔鬼加碼，同意以8,000萬歐元收購巴塞隆拿中場法蘭基迪莊，呢個價錢已經非常接近巴塞要求，預料有望喺6月30日前完成交易。

曼聯早前提出以7,000萬歐元收購呢位25歲荷蘭國腳，但被巴塞隆拿拒絕，由於紅魔鬼新帥坦哈格一直視呢位昔日阿積士愛將為頭號收購目標，所以會方決定加碼，希望盡快簽入法蘭基迪莊，令佢有足夠時間參與季前集訓。

曼聯將於6月27日開操，7月展開亞洲之旅季前熱身賽，首站將於7月12日喺泰國曼谷對利物浦，因此要爭取6月30日前簽入法蘭基迪莊。

兩間球會經過近日磋商之後，取得突破，曼聯方面有信心將法蘭基迪莊收歸旗下，並計劃同佢簽約5年。