車路士想用華拿加錢　換迪歷特

足球博彩神器，每日重心提供盡在《彩報》：http://win.on.cc/football/　

自從傳出馬菲斯迪歷特有意離開祖雲達斯，車路士係最積極斟介嘅一隊，最新消息指，車路士打算用德國前鋒迪姆華拿，再加4000萬鎊嘅條件，向祖記收購迪歷特。

迪歷特3年前以7500萬歐元由阿積士過檔祖記，合約簽到2024年，不過最近佢同祖記續約談判有阻滯，主要係不滿年薪加得唔多，未能滿足佢由800萬歐元年薪加到1200萬歐元，打算申請轉會。

英國傳媒報道，車路士同曼聯都對呢位22歲荷蘭中堅有興趣，迪歷特嘅經理人仲有另一手準備，就係將佢推薦畀巴塞隆拿。

不過實際上有財力簽入呢位荷蘭國腳嘅球會其實唔多，車路士係其中之一，佢哋不但能滿足迪歷特要求，亦能開出具競爭力條件，依家準備報價迪姆華拿另加4000萬鎊轉會費，其實好吸引，只等待祖記同迪歷特回覆。