熱刺簽埋李察利臣　干地笑晒

最強博彩盤路過關神器《串績王》：http://win.on.cc/football/　

上季幫熱刺後上奪得英超前4歐聯資格嘅干地，曾怒批球隊近年轉會政策失敗，今夏球隊果然作出針對性改善，最新消息佢哋即將由愛華頓簽入巴西前鋒李察利臣，又向巴塞隆拿借入基文迪朗格勒，今個轉會窗大豐收，熱刺新季大有前途。

熱刺早前已簽入比蘇馬、比列錫、費沙科士打，相當積極，消息指該隊短期再落實李察利臣交易，會方與球員代表已談妥個人條件，亦因愛華頓要解決財政公平競技條款(FFP)問題，希望將出售李察利臣交易於6月30日前入帳，目標價為5000萬鎊，熱刺有足夠資金應付。

補充前鋒兵力後，干地喺防線亦有增兵，記者迪馬濟奧表示，熱刺將會借入巴塞後衞迪朗格勒，為期一年，該球員同巴塞合約至2026年，但已被通知來季不在沙維計劃之中，因此熱刺又可輕易得手。