【官宣】熱刺簽李察利臣　畀夠6000萬

足球博彩神器，每日重心提供盡在《彩報》：http://win.on.cc/football/　

熱刺官網周五(1日)正式宣布，由愛華頓簽入巴西前鋒李察利臣，簽約5年至2027年，轉會費據報總值6000萬鎊，比之前報道嘅5000萬鎊仲要多。

李察利臣係熱刺今夏第4簽，佢哋之前已簽入比蘇馬、比列錫、費沙科士打，講到名氣同重要性，當然係李察利臣最重磅，報道指熱刺向愛華頓支付固定轉會費5000萬鎊，另加1000萬鎊浮動。

25歲嘅李察利臣2017年加盟屈福特，1年後轉投愛華頓，5季上陣152次，攻入53球，並為巴西國家隊上陣36場，攻入14球，係巴西2019美洲盃及2020東京奧運金牌功臣。

熱刺原本已有哈利卡尼及孫興民雙箭頭，簽入李察利臣後，將變成前鋒三叉戟。領隊干地亦有足夠本錢同曼城、利物浦及車路士列強拗手瓜。