【官宣】沙拿續約利物浦 成英超最高薪球員

20220702
東網電視
更多新聞短片
最強博彩盤路過關神器《串績王》:http://win.on.cc/football/ 
利物浦同穆罕默德沙拿嘅續約拉鋸戰終於告一段落,「紅軍」周五(1日)宣布同沙拿續約3年,據報連同獎金周薪達到40萬鎊,唔單止係利物浦史上最高薪球員,亦超越曼聯嘅C朗拿度成為英超最高人工球員。30歲嘅沙拿決定將足球生涯黃金期奉獻畀利物浦,表示期待為球隊贏得更多冠軍。
沙拿同利物浦談判一直僵持,利物浦唔希望打破薪酬架構,不過隨住沙迪奧文尼離隊,利物浦絕對唔可以畀沙拿下季自由身轉會,最終答應開出球會紀錄嘅35萬鎊周薪,加上有入波數字、捧盃等各項獎金條款,令周薪最高可以去到40萬鎊。為盡快落實續約,利物浦更派出總監獲特飛去希臘麥卡諾斯島,同喺當地度假嘅沙拿進行簽約儀式。
沙拿續約後表示:「今日對所有人都係開心嘅一日,我期待為利物浦贏更多冠軍,續約係花咗一段時間,所有人都做好自己工作,過去5、6年見到球隊嘅走勢向上,今夏亦有新球員加盟,我哋只要繼續努力,向各大錦標進發係好樂觀。」沙拿經理人阿巴斯喺續約後,更即刻舉行一個香檳派對,慶祝為沙拿拎到滿意嘅合約。
隨住呢位埃及前鋒續約利物浦,佢亦成為英超目前最高人工球員,40萬鎊周薪超越C朗拿度同奇雲迪布尼嘅38.5萬鎊周薪,不過沙拿喺整個歐洲球壇只排第4位,輸畀巴黎聖日耳門3大球星基利安麥巴比(100萬鎊周薪)、美斯(96萬鎊周薪)同尼馬(60.6萬鎊周薪)。