明玩嘢！尼馬啟動續約留PSG到2027

最強博彩盤路過關神器《串績王》：http://win.on.cc/football/　

近日盛傳巴黎聖日耳門(PSG)將會踢走巴西前鋒尼馬，多間英超球會都同佢傳出緋聞，不過據法國《隊報》爆料，尼馬唔單止堅持唔會離隊，仲決定提前啟動合約內嘅續約條款，將合約由2026年延至2027年，PSG想賣佢嘅難度將更加大。

PSG班主艾卡理化早前表明，球隊重建要走實務路線，唔會再要一啲「花巧」球員，言論被指係針對尼馬，據報新總監甘波斯亦想踢走呢位巴西前鋒。最大問題係，PSG上年先至同尼馬續約5年，而且周薪超過60萬鎊，要搵球會接手呢張「肥約」難度極高。

法國《隊報》消息指，尼馬用行動表明唔會轉會，佢合約中有一條喺7月1日開始生效嘅續約條款，容許雙方將合約年期延長1年，通常有關條款都會喺合約就嚟完結前先至啟動，但尼馬就決定第1時間啟動，用意就係話畀PSG聽：「想趕我走冇咁易！」