車路士出手截胡　搶簽法蘭基迪莊

最強博彩盤路過關神器《串績王》：http://win.on.cc/football/　

曼聯力爭收購巴塞隆拿中場法蘭基迪莊，遲遲未能成事之餘，仲殺出「程咬金」，英國《衞報》指車路士計劃加入搶購呢位25歲荷蘭國腳，由於車仔擁有歐聯入場券，吸引力更勝紅魔鬼，隨時可以截胡，簽到法蘭基迪莊。

巴塞隆拿為咗減輕財政壓力，基本上已決定出售法蘭基迪莊，甚至接受曼聯開出嘅8,000萬歐元收購價，問題係法蘭基迪莊嫌棄紅魔鬼冇得踢歐聯，拒絕成「魔」。

車路士早前易主後，新班主保利銳意增兵，提升實力奪取英超及歐聯冠軍，目標包括史達寧、尼敦阿基、馬菲斯迪歷特、奧士文尼迪比利等人，依家睇中埋法蘭基迪莊。

由於尼高路簡迪已經31歲，加上佐真奴近年水準下滑，車仔希望簽入法蘭基迪莊，成為中場新重心，亦算合理。

對於巴塞隆拿而言，只要出售法蘭基迪莊，獲得巨額轉會費，就達到目的，賣畀曼聯或者車路士，並冇所謂，但法蘭基迪莊想效力歐聯球隊，明顯會揀車仔，巴塞為咗盡快完成交易，絕對有可能唔同曼聯傾，改為將佢出售畀車路士。