孭得起14號　尼基迪亞「戴帽」助阿仙奴大勝

最強博彩盤路過關神器《串績王》：http://win.on.cc/football/　

阿仙奴喺周六(2日)晚展開首場季前熱身賽，以5比1大勝英甲球隊葉士域治，早前續約嘅前鋒尼基迪亞今仗上演「帽子戲法」，轟入3球及1次助攻，以行動證明自己孭得起兵工廠傳奇射手亨利嘅14號球衣。

今場熱身賽閉門舉行，開賽30秒，尼基迪亞就入波打開紀錄，呢位23歲前鋒跟住傳畀森比盧干加射入空門。其後尼基迪亞2次近門建功，踢咗35分鐘已經完成「帽子戲法」。

換邊之後，巴洛根單刀起腳射中柱反彈，佢自己補射入網，為阿仙奴領先至5比0，葉士域治最後由艾奴高遠射入網破蛋，挽回些少面子。

原本着30號球衣嘅尼基迪亞早前續約後，改着14號，令到好多球迷不滿，認為佢冇能力繼承亨利衣鉢，可能因而刺激佢今場表現特別落力，證明身價。

阿仙奴將於7月8日晚作客同紐倫堡踢熱身賽，之後飛去美國集訓，期間會同愛華頓、奧蘭多城、車路士交鋒，跟住7月30日晚酋長盃出戰西維爾。