C朗歸隊緊急會面 曼聯替補方案曝光

2022年07月04日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
C朗拿度向曼聯提出轉會要求嘅「震撼彈」爆發後,「紅魔鬼」立即採取應變措施,英國傳媒報道C朗會喺周一(4日)歸隊,領隊坦哈格已第一時間安排會面,消息指曼聯嘅立場係唔想放人,亦堅持佢要隨隊喺周五(8日)出發泰國、澳洲集訓之旅。曼聯同時亦製定替補方案,但目標人選令唔少球迷失望。
據《每日電訊報》同《每日鏡報》消息,曼聯有份踢國際賽嘅球員按計劃今個星期初歸隊,而C朗預計會喺周一報到,坦哈格就緊急安排會面,搞清楚C朗嘅疑慮同打算,報道指曼聯嘅立場係唔想放人,C朗仍然係坦哈格計劃中嘅重要成員,而且曼聯亦明顯表示,無論C朗係咪會走,都要參與周五展開嘅2個半星期泰國、澳洲熱身之旅。
C朗上季為曼聯攻入24球,如果佢亦決意離隊,將令本來已經買唔到攻擊球員嘅曼聯更加麻煩,英國《太陽報》指「紅魔鬼」其中一個替補人選,係拜仁慕尼黑嘅德國前鋒基拿比,呢位前阿仙奴球員同拜仁只剩1年合約,預計轉會費為4,000萬鎊,不過佢慣常位置並唔係曼聯要嘅正前鋒類型,更似係收購安東尼計劃嘅Plan B。
英國《曼徹斯報晚報》爆料,喺市場上面欠缺頂尖前鋒情況下,C朗一旦離隊,曼聯可能會選擇二線收購「頂住先」,而3位候選人包括史特加嘅沙沙卡拉積錫、上季同般尼一齊降班嘅荷蘭前鋒韋格賀斯,以及里昂前鋒穆沙迪比利,不過球迷對呢3個人選嘅級數都有保留,認為曼聯應該作出更有野心嘅收購。